ek ujli dua ka saya hai

ek ujlī du'ā kā saaya hai

masjid-e-jāñ meñ kaun aaya hai

aane vaale dinoñ kī soch zarā

ye jo terā hai sab parāyā hai

zaḳhm detā hai sirf apnoñ ko

us ne bhī kyā mizāj paayā hai

vaqt ab kyā mutālbe haiñ tire

ham ne har qarz to chukāyā hai

haar kar tum se dil mohabbat meñ

āñsuoñ kā ḳharāj laayā hai

ham añdhere parakhne vāloñ ne

raushnī se fareb khāyā hai

dostī pyaar e'tibār 'anīs'

'umr bhar bas ye dhan kamāyā hai

ek ujli du'a ka saya hai

masjid-e-jaan mein kaun aaya hai

aane wale dinon ki soch zara

ye jo tera hai sab paraya hai

zaKHm deta hai sirf apnon ko

us ne bhi kya mizaj paya hai

waqt ab kya mutalbe hain tere

hum ne har qarz to chukaya hai

haar kar tum se dil mohabbat mein

aansuon ka KHaraj laya hai

hum andhere parakhne walon ne

raushni se fareb khaya hai

dosti pyar e'tibar 'anis'

'umr bhar bas ye dhan kamaya hai