ek yusuf ke KHaridar hue hain hum log

ek yūsuf ke ḳharīdār hue haiñ ham log

phir mohabbat meñ giraftār hue haiñ ham log

chashm-e-rañgīñ kī karāmāt se ghāyal ho kar

terī ulfat ke talabgār hue haiñ ham log

shahr-e-ḳhūbāñ kī rivāyāt se shorish kar ke

ġham-e-hijrāñ ke sazā-vār hue haiñ ham log

zindagī tū ne hameñ dard ke aañsū baḳhshe

phir bhī tere hī taraf-dār hue haiñ ham log

sub.h-e-ālām kā chehra nahīñ dekhā jaatā

ḳhvāb-e-ḳhush-rañg se bedār hue haiñ ham log

manzil-e-ishq bhī ham ko hī milī hai 'āsif'

dasht-o-sahrā meñ agar ḳhvār hue haiñ ham log

ek yusuf ke KHaridar hue hain hum log

phir mohabbat mein giraftar hue hain hum log

chashm-e-rangin ki karamat se ghayal ho kar

teri ulfat ke talabgar hue hain hum log

shahr-e-KHuban ki riwayat se shorish kar ke

gham-e-hijran ke saza-war hue hain hum log

zindagi tu ne hamein dard ke aansu baKHshe

phir bhi tere hi taraf-dar hue hain hum log

subh-e-alam ka chehra nahin dekha jata

KHwab-e-KHush-rang se bedar hue hain hum log

manzil-e-ishq bhi hum ko hi mili hai 'asif'

dasht-o-sahra mein agar KHwar hue hain hum log