faeda hum ko miTane se bhala kya nikla

fā.eda ham ko miTāne se bhalā kyā niklā

sar se saudā na gayā dil se na jazba niklā

be-maza aise hue talḳhī-e-hālāt se ham

shahd kā zā.iqa chakkhā to vo kaḌvā niklā

dost jitne the vo sab ho ga.e aapas meñ harīf

kaisī mahfil thī jo niklā vo akelā niklā

dil ke har TukḌe meñ mahfūz rahā aks tirā

aa.ina TuuT ke bhī ā.ina-ḳhāna niklā

sar-e-rāhe na sahī haañ sar-e-maqtal hī sahī

ġham se milne kā chalo kuchh to bahāna niklā

qahqahoñ kā jo samundar thā har ik mahfil meñ

ghar meñ vo shaḳhs udāsī kā jazīra niklā

chashm-e-ahbāb bhī nīchī hai to maiñ bhī nādim

jis kueñ meñ mujhe pheñkā thā vo andhā niklā

hāl-e-dil ḳhud hī kahā ḳhud hī sunā hai 'sāġhar'

har muḳhātab mirī taqdīr se bahrā niklā

faeda hum ko miTane se bhala kya nikla

sar se sauda na gaya dil se na jazba nikla

be-maza aise hue talKHi-e-haalat se hum

shahd ka zaiqa chakkha to wo kaDwa nikla

dost jitne the wo sab ho gae aapas mein harif

kaisi mahfil thi jo nikla wo akela nikla

dil ke har TukDe mein mahfuz raha aks tera

aaina TuT ke bhi aaina-KHana nikla

sar-e-rahe na sahi han sar-e-maqtal hi sahi

gham se milne ka chalo kuchh to bahana nikla

qahqahon ka jo samundar tha har ek mahfil mein

ghar mein wo shaKHs udasi ka jazira nikla

chashm-e-ahbab bhi nichi hai to main bhi nadim

jis kuen mein mujhe phenka tha wo andha nikla

haal-e-dil KHud hi kaha KHud hi suna hai 'saghar'

har muKHatab meri taqdir se bahra nikla