fani kahan hai hasti-e-fani ka shor bhi

faanī kahāñ hai hasti-e-fānī kā shor bhī

shāmil hai is meñ naql-e-makānī kā shor bhī

hassās huuñ aur is pe vo shiddat kī pyaas hai

suntā huuñ ab sarāb meñ paanī kā shor bhī

aisā sukūt thā ki sunā.ī diyā mujhe

harf-e-tahī meñ mauj-e-ma.ānī kā shor bhī

be-barg-o-bār peḌ se rahte haiñ duur duur

rah-gīr bhī havā-e-ḳhizānī kā shor bhī

ḳhākistar-e-badan meñ sulagtī hai koī chiiz

bujhtā nahīñ abhī ye javānī kā shor bhī

terī ġhazal paḌhī to ye jaanā 'rafīq'-rāz

paanī ke shor meñ hai ravānī kā shor bhī

fani kahan hai hasti-e-fani ka shor bhi

shamil hai is mein naql-e-makani ka shor bhi

hassas hun aur is pe wo shiddat ki pyas hai

sunta hun ab sarab mein pani ka shor bhi

aisa sukut tha ki sunai diya mujhe

harf-e-tahi mein mauj-e-maani ka shor bhi

be-barg-o-bar peD se rahte hain dur dur

rah-gir bhi hawa-e-KHizani ka shor bhi

KHakistar-e-badan mein sulagti hai koi chiz

bujhta nahin abhi ye jawani ka shor bhi

teri ghazal paDhi to ye jaana 'rafiq'-raaz

pani ke shor mein hai rawani ka shor bhi