fasle na baDh jaen fasle ghaTane se

fāsle na baḌh jaa.eñ fāsle ghaTāne se

aao soch leñ pahle rābte baḌhāne se

'arsh kaañp jaatā thā ek dil dukhāne se

vo zamāna achchhā thā aaj ke zamāne se

ḳhvāhisheñ nahīñ martīñ ḳhvāhisheñ dabāne se

amn ho nahīñ saktā goliyāñ chalāne se

dekh-bhāl kar chalnā lāzmī sahī lekin

tajrabe nahīñ hote Thokareñ na khāne se

ek zulm kartā hai ek zulm sahtā hai

aap kā ta'alluq hai kaun se gharāne se

kitne zaḳhm chhilte haiñ kitne phuul khilte haiñ

gaah tere aane se gaah tere jaane se

kār-zār-e-hastī meñ apnā daḳhl itnā hai

hans diye hañsāne se ro diye rulāne se

chhoTe chhoTe shahroñ par kyoñ na iktifā kar leñ

khetiyāñ ujaḌtī haiñ bastiyāñ basāne se

zaḳhm bhī lagāte ho phuul bhī khilāte ho

kitne kaam lete ho ek muskurāne se

aur bhī sañvartā hai aur bhī nikhartā hai

jalva-e-ruḳh-e-jānāñ dekhne dikhāne se

jab talak na TuuTe the ḳhair-o-shar ke paimāne

vo zamāna achchhā thā aaj ke zamāne se

har taraf charāġhāñ ho tab kahīñ ujālā ho

aur ham gurezāñ haiñ ik diyā jalāne se

chāñd āsmāñ kā ho yā zamīn kā 'nusrat'

kaun baaz aatā hai uñgliyāñ uThāne se

fasle na baDh jaen fasle ghaTane se

aao soch len pahle rabte baDhane se

'arsh kanp jata tha ek dil dukhane se

wo zamana achchha tha aaj ke zamane se

KHwahishen nahin martin KHwahishen dabane se

amn ho nahin sakta goliyan chalane se

dekh-bhaal kar chalna lazmi sahi lekin

tajrabe nahin hote Thokaren na khane se

ek zulm karta hai ek zulm sahta hai

aap ka ta'alluq hai kaun se gharane se

kitne zaKHm chhilte hain kitne phul khilte hain

gah tere aane se gah tere jaane se

kar-zar-e-hasti mein apna daKHl itna hai

hans diye hansane se ro diye rulane se

chhoTe chhoTe shahron par kyon na iktifa kar len

khetiyan ujaDti hain bastiyan basane se

zaKHm bhi lagate ho phul bhi khilate ho

kitne kaam lete ho ek muskurane se

aur bhi sanwarta hai aur bhi nikharta hai

jalwa-e-ruKH-e-jaanan dekhne dikhane se

jab talak na TuTe the KHair-o-shar ke paimane

wo zamana achchha tha aaj ke zamane se

har taraf charaghan ho tab kahin ujala ho

aur hum gurezan hain ek diya jalane se

chand aasman ka ho ya zamin ka 'nusrat'

kaun baz aata hai ungliyan uThane se