faisla hijr ka manzur bhi ho sakta hai

faisla hijr kā manzūr bhī ho saktā hai

aadmī ishq meñ majbūr bhī ho saktā hai

vaqt ke paas nahīñ zaḳhm-e-mohabbat kā ilaaj

vaqt ke saath ye nāsūr bhī ho saktā hai

jī meñ aatā hai use haath lagā kar dekhūñ

nuur sā lagtā hai, vo nuur bhī ho saktā hai

apne kāñdhoñ pe salīboñ ko uThā.e hue haiñ

ishq-zādoñ kā ye dastūr bhī ho saktā hai

zehn kā kyā hai ki bachne ke bahāne DhūñDe

dil to jāñbāz hai, mansūr bhī ho saktā hai

sher kahne kā salīqa nahīñ 'hāshim' ko magar

terī tanqīd se mash.hūr bhī ho saktā hai

faisla hijr ka manzur bhi ho sakta hai

aadmi ishq mein majbur bhi ho sakta hai

waqt ke pas nahin zaKHm-e-mohabbat ka ilaj

waqt ke sath ye nasur bhi ho sakta hai

ji mein aata hai use hath laga kar dekhun

nur sa lagta hai, wo nur bhi ho sakta hai

apne kandhon pe salibon ko uThae hue hain

ishq-zadon ka ye dastur bhi ho sakta hai

zehn ka kya hai ki bachne ke bahane DhunDe

dil to jaanbaz hai, mansur bhi ho sakta hai

sher kahne ka saliqa nahin 'hashim' ko magar

teri tanqid se mashhur bhi ho sakta hai