faiz kya aasman se nikla

faiz kyā āsmān se niklā

jo bhī niklā gumān se niklā

chhup ke mujh se utar gayā mujh meñ

phir baḌī ān-bān se niklā

kabhī niklā vo ḳhāna-e-dil se

aur kabhī dāstān se niklā

chup jo TuuTī to is tarah TuuTī

jaise sho.ala zabān se niklā

āsmāñ sar pe aur zamīñ nīche

sab ye apne gumān se niklā

kitnā DhūñDā magar mirā saaya

yaad ke ik makān se niklā

dil thamā thā abhī kī vo chehra

dhund ke darmiyān se niklā

saaya saaya bikhar gayā jab maiñ

tab tire imtihān se niklā

jo dhuñdlakoñ meñ aa rahā hai nazar

kyā kisī ke bayān se niklā

maiñ pukārā kiyā use barsoñ

vo na apne makān se niklā

aah yuuñ niklā us ke kūche se

jaise 'ajmal' jahān se niklā

faiz kya aasman se nikla

jo bhi nikla guman se nikla

chhup ke mujh se utar gaya mujh mein

phir baDi aan-ban se nikla

kabhi nikla wo KHana-e-dil se

aur kabhi dastan se nikla

chup jo TuTi to is tarah TuTi

jaise shoala zaban se nikla

aasman sar pe aur zamin niche

sab ye apne guman se nikla

kitna DhunDa magar mera saya

yaad ke ek makan se nikla

dil thama tha abhi ki wo chehra

dhund ke darmiyan se nikla

saya saya bikhar gaya jab main

tab tere imtihan se nikla

jo dhundlakon mein aa raha hai nazar

kya kisi ke bayan se nikla

main pukara kiya use barson

wo na apne makan se nikla

aah yun nikla us ke kuche se

jaise 'ajmal' jahan se nikla