faiz ye uThaya hai be-zaban parindon se

faiz ye uThāyā hai be-zabāñ parindoñ se

ham ne siikh liiñ mīThī boliyāñ parindoñ se

maiñ to uḌ nahīñ saktā phir bhī mutma.in hai dil

āsmāñ kī suntā hai dāstāñ parindoñ se

ai na.e zamāne ke Dākiye tū kyā jaane

ham vasūl karte the chiTThiyāñ parindoñ se

ek raah ik manzil ek hī hadaf un kā

bhiiḌ ham se bantī hai kārvāñ parindoñ se

bhuuk pyaas meñ bhī haiñ jaarī un kī parvāzeñ

azm-o-hausla sīkho nā-tavāñ parindoñ se

mat kaho khañDar is ko ġhaur se zarā dekho

kis qadar hai bā-raunaq ye makāñ parindoñ se

jab zamīn par koī hādsa nahīñ guzrā

chhup gayā hai kyoñ āḳhir āsmāñ parindoñ se

faiz ye uThaya hai be-zaban parindon se

hum ne sikh lin miThi boliyan parindon se

main to uD nahin sakta phir bhi mutmain hai dil

aasman ki sunta hai dastan parindon se

ai nae zamane ke Dakiye tu kya jaane

hum wasul karte the chiTThiyan parindon se

ek rah ek manzil ek hi hadaf un ka

bhiD hum se banti hai karwan parindon se

bhuk pyas mein bhi hain jari un ki parwazen

azm-o-hausla sikho na-tawan parindon se

mat kaho khanDar is ko ghaur se zara dekho

kis qadar hai ba-raunaq ye makan parindon se

jab zamin par koi hadsa nahin guzra

chhup gaya hai kyon aaKHir aasman parindon se