faizan-e-mohabbat na hua aam abhi tak

faizān-e-mohabbat na huā aam abhī tak

tārīk hai insān kā anjām abhī tak

maiḳhāne meñ hai tishna-labī aam abhī tak

gardish meñ mohabbat ke nahīñ jaam abhī tak

chhīnā hai sukūñ dahr kā arbāb-e-ḳhirad ne

haiñ ahl-e-junūñ morid-e-ilzām abhī tak

vāmāñda-e-manzil hai jo ai rāh-rav-e-shauq

shāyad hai tirā zauq-e-talab ḳhaam abhī tak

is duar-e-sukūñ soz-o-pur-āshob meñ ai dost

māyūs nahīñ hai dil-e-nākām abhī tak

ruḳhsat huā go daur-e-ḳhizāñ fasl-e-gul aa.ī

gulshan ke vahī haiñ sahar-o-shām abhī tak

pahūñchā to bashar rif.at-e-mirriḳh-o-qamar par

qaabū meñ nahīñ gardish-e-ayyām abhī tak

duniyā ne jise rif.at-e-fārāñ se sunā thā

hai amn kā zāmin vahī paiġhām abhī tak

go tābish-e-anvār se ḳhīra haiñ nigāheñ

hai sub.h ke ruḳh par asar-e-shām abhī tak

nādim to haiñ vo qatl pe arbāb-e-vafā ke

lekin sar-e-fihrist haiñ kuchh naam abhī tak

saaqī tire maiḳhāne kī tanzīm-e-ġhalat par

sunte haiñ ki rindoñ meñ hai kohrām abhī tak

dhabba nahīñ go dāman-e-tahzīb pe lekin

milte haiñ yahāñ banda-e-be-dām abhī tak

muddat huī kuchh rabt nahīñ sher-o-suḳhan se

hotā hai mire qalb ko ilhām abhī tak

is par bhī nigāh-e-karam ai fātir-e-hastī

'zauqī' hai rahīn-e-ġham-o-ālām abhī tak

faizan-e-mohabbat na hua aam abhi tak

tarik hai insan ka anjam abhi tak

maiKHane mein hai tishna-labi aam abhi tak

gardish mein mohabbat ke nahin jam abhi tak

chhina hai sukun dahr ka arbab-e-KHirad ne

hain ahl-e-junun morid-e-ilzam abhi tak

wamanda-e-manzil hai jo ai rah-raw-e-shauq

shayad hai tera zauq-e-talab KHam abhi tak

is duar-e-sukun soz-o-pur-ashob mein ai dost

mayus nahin hai dil-e-nakaam abhi tak

ruKHsat hua go daur-e-KHizan fasl-e-gul aai

gulshan ke wahi hain sahar-o-sham abhi tak

pahuncha to bashar rifat-e-mirriKH-o-qamar par

qabu mein nahin gardish-e-ayyam abhi tak

duniya ne jise rifat-e-faran se suna tha

hai amn ka zamin wahi paigham abhi tak

go tabish-e-anwar se KHira hain nigahen

hai subh ke ruKH par asar-e-sham abhi tak

nadim to hain wo qatl pe arbab-e-wafa ke

lekin sar-e-fihrist hain kuchh nam abhi tak

saqi tere maiKHane ki tanzim-e-ghalat par

sunte hain ki rindon mein hai kohram abhi tak

dhabba nahin go daman-e-tahzib pe lekin

milte hain yahan banda-e-be-dam abhi tak

muddat hui kuchh rabt nahin sher-o-suKHan se

hota hai mere qalb ko ilham abhi tak

is par bhi nigah-e-karam ai fatir-e-hasti

'zauqi' hai rahin-e-gham-o-alam abhi tak