falak ka bojh zamin ko uThana paDta hai

falak kā bojh zamīñ ko uThānā paḌtā hai

aur ik madār meñ ḳhud ko ghumānā paḌtā hai

ye raat kaTtī hai ummīd-e-sub.h-e-nau meñ mirī

ye din sukūñ kī talab meñ bitānā paḌtā hai

mile na jab koī saanī hamārā duniyā ko

to apne pahlū se ḳhud ko uThānā paḌtā hai

tamām log to chehra-shanās hote nahīñ

isī liye to qabīla batānā paḌtā hai

kabhī kabhār ye vahshat barā.e naam rahe

kabhī kabhār to manzar pe aanā paḌtā hai

tū apne taaq meñ apnā diyā jalā.e rakh

ham ahl-e-dil haiñ hameñ dil jalānā paḌtā hai

unhī se pūchh mohabbat kī sho'lagī hai kyā

ki zaḳhm khā ke jinheñ muskurānā paḌtā hai

phir is ke baa'd kahīñ lauTtī hai bīnā.ī

har ek aañkh se manzar uThānā paḌtā hai

tirī sharāb kī 'izzat bachāne kī ḳhātir

binā piye bhī hameñ laḌkhaḌānā paḌtā hai

vo mujh se pūchh le shāyad kabhī pasand mirī

so har ḳhayāl ko manzar pe laanā paḌtā hai

'alāmatoñ ko samajhtā nahīñ koī 'ārib'

hameñ charāġh kā mā'nī batānā paḌtā hai

falak ka bojh zamin ko uThana paDta hai

aur ek madar mein KHud ko ghumana paDta hai

ye raat kaTti hai ummid-e-subh-e-nau mein meri

ye din sukun ki talab mein bitana paDta hai

mile na jab koi sani hamara duniya ko

to apne pahlu se KHud ko uThana paDta hai

tamam log to chehra-shanas hote nahin

isi liye to qabila batana paDta hai

kabhi kabhaar ye wahshat barae nam rahe

kabhi kabhaar to manzar pe aana paDta hai

tu apne taq mein apna diya jalae rakh

hum ahl-e-dil hain hamein dil jalana paDta hai

unhi se puchh mohabbat ki sho'lagi hai kya

ki zaKHm kha ke jinhen muskurana paDta hai

phir is ke ba'd kahin lauTti hai binai

har ek aankh se manzar uThana paDta hai

teri sharab ki 'izzat bachane ki KHatir

bina piye bhi hamein laDkhaDana paDta hai

wo mujh se puchh le shayad kabhi pasand meri

so har KHayal ko manzar pe lana paDta hai

'alamaton ko samajhta nahin koi 'arib'

hamein charagh ka ma'ni batana paDta hai