falak ke na in mah-paron ko dekho

falak ke na in māh-pāroñ ko dekho

jo miTTī meñ haiñ un sitāroñ ko dekho

kabhī kārvāñ bhī numūdār hogā

nigāheñ jamā.e ġhubāroñ ko dekho

nikal kar kabhī sahr-e-sūd-o-ziyāñ se

mohabbat ke ujḌe dayāroñ ko dekho

chaman meñ ye kis chaal se chal rahe ho

na phūloñ ko dekho na ḳhāroñ ko dekho

zabāñ husn kī mo'atabar kab huī hai

kināyoñ ko samjho ishāroñ ko dekho

musalleh qatāreñ idhar bhī udhar bhī

zarā amn kī rāh-guzāroñ ko dekho

chaman kī ḳhizāñ par na aañsū bahāo

nazar hai to kal kī bahāroñ ko dekho

na dekho daraḳhtoñ kī duurī chaman meñ

lipaTtī huī shāḳh-sāroñ ko dekho

zarā jhāñk kar ġhurfa-e-mai-kada se

taraste laboñ kī qatāroñ ko dekho

kisī ke sitam ko bhī samajhte tavajjoh

are in taġhāful ke māroñ ko dekho

vo daur-e-hayāt-e-jahāñ aa gayā hai

bhañvar meñ raho aur kināroñ ko dekho

baḌho aur hāthoñ kā ik pal banā lo

kināroñ se kab tak savāroñ ko dekho

binā-e-baqā dhamkīyoñ par fanā kī

na.e jag ke parvardigāroñ ko dekho

kabhī nām-e-'mullā' na aayā zabāñ tak

ye duniyā hai 'mullā' ke yāroñ ko dekho

falak ke na in mah-paron ko dekho

jo miTTi mein hain un sitaron ko dekho

kabhi karwan bhi numudar hoga

nigahen jamae ghubaron ko dekho

nikal kar kabhi sahr-e-sud-o-ziyan se

mohabbat ke ujDe dayaron ko dekho

chaman mein ye kis chaal se chal rahe ho

na phulon ko dekho na KHaron ko dekho

zaban husn ki mo'atabar kab hui hai

kinayon ko samjho ishaaron ko dekho

musalleh qataren idhar bhi udhar bhi

zara amn ki rah-guzaron ko dekho

chaman ki KHizan par na aansu bahao

nazar hai to kal ki bahaaron ko dekho

na dekho daraKHton ki duri chaman mein

lipaTti hui shaKH-saron ko dekho

zara jhank kar ghurfa-e-mai-kada se

taraste labon ki qataron ko dekho

kisi ke sitam ko bhi samajhte tawajjoh

are in taghaful ke maron ko dekho

wo daur-e-hayat-e-jahan aa gaya hai

bhanwar mein raho aur kinaron ko dekho

baDho aur hathon ka ek pal bana lo

kinaron se kab tak sawaron ko dekho

bina-e-baqa dhamkiyon par fana ki

nae jag ke parwardigaron ko dekho

kabhi nam-e-'mulla' na aaya zaban tak

ye duniya hai 'mulla' ke yaron ko dekho