falak ko fikr koi mehr-o-mah tak pahunche

falak ko fikr koī mehr-o-māh tak pahuñche

hameñ ye zo'm ki ham vaah vaah tak pahuñche

unheñ na rakh tū karam kī nigāh se mahrūm

jo luT-luTā ke tirī bārgāh tak pahuñche

huā na ham se mudāvā-e-dard-e-nau-e-bashar

bahut chale to savāb-o-gunāh tak pahuñche

na jaane kab se huuñ sargarm-e-justujū ai dost

na jaane kab ruḳh-e-manzil nigāh tak pahuñche

vufūr-e-shauq meñ ye ehtiyāt ho na sakī

ki aarzū na hamārī nigāh tak pahuñche

hamārī ziist kī rūdād-e-gul ye hai 'jāved'

ki mai-kade se chale ḳhānqāh tak pahuñche

falak ko fikr koi mehr-o-mah tak pahunche

hamein ye zo'm ki hum wah wah tak pahunche

unhen na rakh tu karam ki nigah se mahrum

jo luT-luTa ke teri bargah tak pahunche

hua na hum se mudawa-e-dard-e-nau-e-bashar

bahut chale to sawab-o-gunah tak pahunche

na jaane kab se hun sargarm-e-justuju ai dost

na jaane kab ruKH-e-manzil nigah tak pahunche

wufur-e-shauq mein ye ehtiyat ho na saki

ki aarzu na hamari nigah tak pahunche

hamari zist ki rudad-e-gul ye hai 'jawed'

ki mai-kade se chale KHanqah tak pahunche