فلک نشیں ہیں کبھی آزما کے دیکھا جائے

فلک نشیں ہیں کبھی آزما کے دیکھا جائے

صدائیں ہم کو وہیں سے لگا کے دیکھا جائے

وہ صد حجاب میں روپوش بھی نہیں لیکن

ہوس ہے دید کو پردہ اٹھا کے دیکھا جائے

ہر اک سخن پہ ستائش عذاب لگتی ہے

کبھی تو ہم کو نظر سے گرا کے دیکھا جائے

وہ پھول ہے تو اسے جان تک کرو محسوس

وہ چاند ہے تو اندھیرا بڑھا کے دیکھا جائے

اگر وہ عشق ہے ہنس کر پہاڑ اٹھا لو گے

اگر ہے بوجھ تو سر سے گرا کے دیکھا جائے

لطافت رخ زیبا پہ بار ہیں نظریں

سو شرط یہ ہے کہ پلکیں جھکا کے دیکھا جائے