falak ne abr mere sine ka buKhaar kiya

falak ne abr mire siine kā buḳhār kiyā

mujhe mujhī pe sitamgar ne ashk-bār kiyā

har ek zarre ne ījād sad-bahār kiyā

ye merī ḳhaak ko kis gul ne rahguzār kiyā

balā hai shauq-e-shahādat na us ne vaar kiyā

jigar ko aap hī baḌh kar sināñ ke paar kiyā

maiñ ḳhush huuñ vāda-e-fardā pe kaun shaḳhs huuñ maiñ

vo shoḳh aur ye umr us pe e.atibār kiyā

kuchh aisī chiiz na the do-jahān kyā hote

dikhā ke aa.ina tum par tumheñ nisār kiyā

zamīñ meñ zalzala hai āsmāñ meñ tahlka hai

kisī ne aaj kisī dil ko be-qarār kiyā

ye aable nahīñ niklī hai aañkh har mū par

tirā to mere sarāpe ne intizār kiyā

mazāq-e-ishq to dekho ki dil hī dil nikle

jo chaak siina mirā sūrat-e-anār kiyā

hanūz sañg meñ ā.īna hai ḳhushā farhād

ki ba.ad-e-marg bhī shīrīñ kā intizār kiyā

tarīq-e-ishq meñ kī be-ḳhudī se tai manzil

ye thī vo rah ki na apnā bhī e.atibār kiyā

ki kyuuñ ho āshiq-o-māshūq kā jahāñ dushman

ki husn-o-ishq ne achchhoñ ko be-qarār kiyā

udhar vo jalva ki muusā ko be-havās rakhā

idhar ye jazba ki yūsuf ko be-dayār kiyā

saroñ pe dāvar-e-mahshar ne farsh kiiñ āñkheñ

tumhāre aane kā kyā kyā na intizār kiyā

'bayāñ' mirā dil-e-ḳhūnīñ vo qatra hai jis ko

muhīt-e-āzam-e-ġham-hā-e-rozgār kiyā

falak ne abr mere sine ka buKHar kiya

mujhe mujhi pe sitamgar ne ashk-bar kiya

har ek zarre ne ijad sad-bahaar kiya

ye meri KHak ko kis gul ne rahguzar kiya

bala hai shauq-e-shahadat na us ne war kiya

jigar ko aap hi baDh kar sinan ke par kiya

main KHush hun wada-e-farda pe kaun shaKHs hun main

wo shoKH aur ye umr us pe eatibar kiya

kuchh aisi chiz na the do-jahan kya hote

dikha ke aaina tum par tumhein nisar kiya

zamin mein zalzala hai aasman mein tahlka hai

kisi ne aaj kisi dil ko be-qarar kiya

ye aable nahin nikli hai aankh har mu par

tera to mere sarape ne intizar kiya

mazaq-e-ishq to dekho ki dil hi dil nikle

jo chaak sina mera surat-e-anar kiya

hanuz sang mein aaina hai KHusha farhad

ki baad-e-marg bhi shirin ka intizar kiya

tariq-e-ishq mein ki be-KHudi se tai manzil

ye thi wo rah ki na apna bhi eatibar kiya

ki kyun ho aashiq-o-mashuq ka jahan dushman

ki husn-o-ishq ne achchhon ko be-qarar kiya

udhar wo jalwa ki musa ko be-hawas rakha

idhar ye jazba ki yusuf ko be-dayar kiya

saron pe dawar-e-mahshar ne farsh kin aankhen

tumhaare aane ka kya kya na intizar kiya

'bayan' mera dil-e-KHunin wo qatra hai jis ko

muhit-e-azam-e-gham-ha-e-rozgar kiya