falak ne sikha hai haalat ko zubun karna

falak ne sīkhā hai hālāt ko zubūñ karnā

har ek ghar ko kisī tarah be-sutūñ karnā

simaT ke aa.e na āshuftagī zamāne kī

dil-o-nigāh meñ ashkoñ se kuchh sukūñ karnā

hinā.ī dast ko lahrā ke ḳhush fazāoñ meñ

ḳhushī se lauT ke aane kā ik shugūñ karnā

vo lauT aa.e to shikve bhī multavī hoñge

hisāb-e-dard ko ab aur kyā fuzūñ karnā

fasīl-e-shahr meñ aaseb bhuul jaane kā

pahan ke yaad kī ta.avīz kyā fusūñ karnā

na hosh aa.e mujhe pattharoñ kī bastī meñ

uThā ke sang mujhe sāhib-e-junūñ karnā

jo dastaras meñ ho taz.īn-e-jism-o-jān agar

kisī kī yaad se hī zīnat-e-darūñ karnā

huā hai ḳhuun bhī 'suġhrā' kā ḳhvāb banñe meñ

ki maslahat hī kī ḳhātir na ḳhvāb ḳhuuñ karnā

falak ne sikha hai haalat ko zubun karna

har ek ghar ko kisi tarah be-sutun karna

simaT ke aae na aashuftagi zamane ki

dil-o-nigah mein ashkon se kuchh sukun karna

hinai dast ko lahra ke KHush fazaon mein

KHushi se lauT ke aane ka ek shugun karna

wo lauT aae to shikwe bhi multawi honge

hisab-e-dard ko ab aur kya fuzun karna

fasil-e-shahr mein aaseb bhul jaane ka

pahan ke yaad ki tawiz kya fusun karna

na hosh aae mujhe pattharon ki basti mein

uTha ke sang mujhe sahib-e-junun karna

jo dastaras mein ho tazin-e-jism-o-jaan agar

kisi ki yaad se hi zinat-e-darun karna

hua hai KHun bhi 'sughra' ka KHwab banne mein

ki maslahat hi ki KHatir na KHwab KHun karna