falak par jalta bujhta ek sitara tha wo main tha

falak par jaltā bujhtā ik sitāra thā vo maiñ thā

umīd-o-yās kā jo shaḳhs maarā thā vo maiñ thā

hamesha jiit kar tum se jo haarā thā vo maiñ thā

vafā kā jis ke hisse meñ ḳhasāra thā vo maiñ thā

anā ke shahr meñ jashn-e-bulandī thā vo tum the

vahīñ ik samt mātam kā nazāra thā vo maiñ thā

mujhe ab yuuñ na dekho maiñ amānat huuñ kisī kī

mohabbat ke dinoñ meñ jo tumhārā thā vo maiñ thā

ḳhushī meñ jo tire hamrāh thā vo thā zamāna

ġhamoñ ke daur meñ jis kā sahārā thā vo maiñ thā

vo koī aur thā tum baḌh rahe the jis kī jānib

vo jis ne ro ke pīchhe se pukārā thā vo maiñ thā

chalā thā jab vo mele meñ pakaḌ kar haath merā

fazā meñ sab se ūñchā jo ġhubbāra thā vo maiñ thā

javānī meñ bahāroñ par tirā qabza thā 'aḳhlāq'

magar dil par tire jis kā ijāra thā vo maiñ thā

falak par jalta bujhta ek sitara tha wo main tha

umid-o-yas ka jo shaKHs mara tha wo main tha

hamesha jit kar tum se jo haara tha wo main tha

wafa ka jis ke hisse mein KHasara tha wo main tha

ana ke shahr mein jashn-e-bulandi tha wo tum the

wahin ek samt matam ka nazara tha wo main tha

mujhe ab yun na dekho main amanat hun kisi ki

mohabbat ke dinon mein jo tumhaara tha wo main tha

KHushi mein jo tere hamrah tha wo tha zamana

ghamon ke daur mein jis ka sahaara tha wo main tha

wo koi aur tha tum baDh rahe the jis ki jaanib

wo jis ne ro ke pichhe se pukara tha wo main tha

chala tha jab wo mele mein pakaD kar hath mera

faza mein sab se uncha jo ghubbara tha wo main tha

jawani mein bahaaron par tera qabza tha 'aKHlaq'

magar dil par tere jis ka ijara tha wo main tha