falak se dur kahin hai sanam zamin pe nahin

falak se duur kahīñ hai sanam zamīñ pe nahīñ

maiñ us se milte hue kam se kam zamīñ pe nahīñ

zamīñ pe baiTh ke likhtā huuñ arsh kā qissa

qadam zamīñ pe haiñ mere qalam zamīñ pe nahīñ

jo dekhnā hai hameñ to nazar uThā apnī

zamīñ se dekh hamāre qadam zamīñ pe nahīñ

kisī kī chashm-e-karam hai jo thaam rakhtī hai

kisī kī nazr-e-karam hai ki ham zamīñ pe nahīñ

ye jugnū chāñd sitāre haiñ ham-rikāb mire

maiñ kyā karūñ ki koī ham-qadam zamīñ pe nahīñ

kaTe haiñ baazū to thāmā hai apne dāñtoñ se

hazār shukr girā hai alam zamīñ pe nahīñ

maiñ raat ḳhvāb meñ pahuñchā thā un ke qadmoñ meñ

ḳhudā kā shukr ki niklā hai dam zamīñ pe nahīñ

falak se dur kahin hai sanam zamin pe nahin

main us se milte hue kam se kam zamin pe nahin

zamin pe baiTh ke likhta hun arsh ka qissa

qadam zamin pe hain mere qalam zamin pe nahin

jo dekhna hai hamein to nazar uTha apni

zamin se dekh hamare qadam zamin pe nahin

kisi ki chashm-e-karam hai jo tham rakhti hai

kisi ki nazr-e-karam hai ki hum zamin pe nahin

ye jugnu chand sitare hain ham-rikab mere

main kya karun ki koi ham-qadam zamin pe nahin

kaTe hain bazu to thama hai apne danton se

hazar shukr gira hai alam zamin pe nahin

main raat KHwab mein pahuncha tha un ke qadmon mein

KHuda ka shukr ki nikla hai dam zamin pe nahin