falak se hue hain ye paiham ishaare

falak se hue haiñ ye paiham ishāre

zamīñ se nahīñ duur ye chāñd taare

munavvar huī merī shām-e-ġharībāñ

ki yaad aa rahe haiñ vatan ke nazāre

mirī zindagī hai ki hai ek tūfāñ

ye bechain lahreñ ye betāb dhāre

tabī.at ne merī kabhī bhī na DhūñDe

ye sāhil safīne vo saa.e sahāre

ulajh saktā huuñ ab bhī tūfāñ se sāthī

ye kyoñ merī kashtī lagā dī kināre

ye hamvār-o-yaksāñ sī kyā zindagī hai

na āñdhī na tūfāñ na sho.ale sharāre

kahīñ chhīn le mujh se piirī na aa kar

ye siine kī garmī nazar ke sharāre

hai bachchoñ kā ik khel ye zindagī bhī

hasīñ jo vo jiite hasīñ vo jo haare

kabhī pyaar karke kabhī pyaar pā kar

jiye ham jahāñ meñ usī ke sahāre

ye patte haiñ larzāñ vo gul dam-ba-ḳhud

bas ik ham na samjheñ ḳhizāñ ke ishāre

'habīb' aap duniyāñ ko pahchānte haiñ

vo ye rañg badle ki vo ruup dhāre

falak se hue hain ye paiham ishaare

zamin se nahin dur ye chand tare

munawwar hui meri sham-e-ghariban

ki yaad aa rahe hain watan ke nazare

meri zindagi hai ki hai ek tufan

ye bechain lahren ye betab dhaare

tabiat ne meri kabhi bhi na DhunDe

ye sahil safine wo sae sahaare

ulajh sakta hun ab bhi tufan se sathi

ye kyon meri kashti laga di kinare

ye hamwar-o-yaksan si kya zindagi hai

na aandhi na tufan na shoale sharare

kahin chhin le mujh se piri na aa kar

ye sine ki garmi nazar ke sharare

hai bachchon ka ek khel ye zindagi bhi

hasin jo wo jite hasin wo jo haare

kabhi pyar karke kabhi pyar pa kar

jiye hum jahan mein usi ke sahaare

ye patte hain larzan wo gul dam-ba-KHud

bas ek hum na samjhen KHizan ke ishaare

'habib' aap duniyan ko pahchante hain

wo ye rang badle ki wo rup dhaare