falak se jo hue dharti ki nazr sada log

falak se jo hue dhartī kī nazr saada log

unhī ke ġham se haiñ vāqif ye be-libāda log

maiñ apne aap ko ab DhūñDh bhī nahīñ saktā

mire janāze meñ haiñ is qadar ziyāda log

unhī meñ maiñ bhī huuñ shāmil so tū nahīñ miltā

banā ke toḌne vaale haiñ jo irāda log

ki chiir Daalā gayā pahle be-gunāh mujhe

mire vajūd kā chunte haiñ ab burāda log

rafīq chhoḌ ke dil meñ jo rakkheñ dushman ko

ki mere jaise kahāñ hoñge dil-kushāda log

jalā rahā huuñ maiñ ḳhud ko kuchh is liye 'tāhir'

kareñge diip kī is lau se istifāda log

falak se jo hue dharti ki nazr sada log

unhi ke gham se hain waqif ye be-libaada log

main apne aap ko ab DhunDh bhi nahin sakta

mere janaze mein hain is qadar ziyaada log

unhi mein main bhi hun shamil so tu nahin milta

bana ke toDne wale hain jo irada log

ki chir Dala gaya pahle be-gunah mujhe

mere wajud ka chunte hain ab burada log

rafiq chhoD ke dil mein jo rakkhen dushman ko

ki mere jaise kahan honge dil-kushada log

jala raha hun main KHud ko kuchh is liye 'tahir'

karenge dip ki is lau se istifada log