fana-baqa bhi samajhne lage bahut se log

fanā-baqā bhī samajhne lage bahut se log

ye falsafa bhī samajhne lage bahut se log

jahāñ thī aql ke andhoñ kī ek bhiiḌ vahīñ

burā-bhalā bhī samajhne lage bahut se log

chhupā rahe haiñ charāġhoñ kī lau hathelī se

to kyā havā bhī samajhne lage bahut se log

maiñ nāḳhudā bhī jise kah ke sharmsār huuñ aaj

use ḳhudā bhī samajhne lage bahut se log

ḳhud apne hoñToñ pe jis din se jaḌ diye taale

mirī sadā bhī samajhne lage bahut se log

jo ham samajhte the sach bolnā hai ik in.aam

hai ye sazā bhī samajhne lage bahut se log

hamesha chhoTā banā kar jo ḳhud ko pesh kiyā

mujhe baḌā bhī samajhne lage bahut se log

bas ek faisla aane kī der thī 'shāhid'

muqaddama bhī samajhne lage bahut se log

fana-baqa bhi samajhne lage bahut se log

ye falsafa bhi samajhne lage bahut se log

jahan thi aql ke andhon ki ek bhiD wahin

bura-bhala bhi samajhne lage bahut se log

chhupa rahe hain charaghon ki lau hatheli se

to kya hawa bhi samajhne lage bahut se log

main naKHuda bhi jise kah ke sharmsar hun aaj

use KHuda bhi samajhne lage bahut se log

KHud apne honTon pe jis din se jaD diye tale

meri sada bhi samajhne lage bahut se log

jo hum samajhte the sach bolna hai ek inam

hai ye saza bhi samajhne lage bahut se log

hamesha chhoTa bana kar jo KHud ko pesh kiya

mujhe baDa bhi samajhne lage bahut se log

bas ek faisla aane ki der thi 'shahid'

muqaddama bhi samajhne lage bahut se log