fana ke raste par gamzan hain hum mere hamdam

fanā ke rāste par gāmzan haiñ ham mire hamdam

sañbhal kar paañv rakkheñ ab hai shām-e-ġham mire hamdam

añdhere meñ nikalnā hai talāsh-e-nūr meñ tujh ko

kabhī lau ho na tere dard kī maddham mere hamdam

guzartī jā rahī hai umr saarī fikr-e-duniyā meñ

kabhī ho fikr-e-fardā meñ nigah pur-nam mire hamdam

riyā kī hukmrānī har taraf hai tū bhī ab dikhlā

yahāñ iḳhlās kī shamshīr kā dam-ḳham mire hamdam

charāġh-e-ilm-o-fan terā agar raushan rahe yūñhī

na hogā jalva-e-fikr-o-nazar bhī kam mire hamdam

havā bātil kī phir ab sansanātī hai zamāne meñ

hirāsāñ kyoñ hai tū rakh kar yaqīñ mohkam mire hamdam

tirī yādoñ kā parcham jab bhī lahrātā hai āñkhoñ meñ

tirī qurbat bhulā detī hai hāl-e-ġham mire hamdam

fana ke raste par gamzan hain hum mere hamdam

sanbhal kar panw rakkhen ab hai sham-e-gham mere hamdam

andhere mein nikalna hai talash-e-nur mein tujh ko

kabhi lau ho na tere dard ki maddham mere hamdam

guzarti ja rahi hai umr sari fikr-e-duniya mein

kabhi ho fikr-e-farda mein nigah pur-nam mere hamdam

riya ki hukmrani har taraf hai tu bhi ab dikhla

yahan iKHlas ki shamshir ka dam-KHam mere hamdam

charagh-e-ilm-o-fan tera agar raushan rahe yunhi

na hoga jalwa-e-fikr-o-nazar bhi kam mere hamdam

hawa baatil ki phir ab sansanati hai zamane mein

hirasan kyon hai tu rakh kar yaqin mohkam mere hamdam

teri yaadon ka parcham jab bhi lahraata hai aankhon mein

teri qurbat bhula deti hai haal-e-gham mere hamdam