fana ki samt chala hun baqa main kya jaanun

fanā kī samt chalā huuñ baqā maiñ kyā jānūñ

ye kaisī baat hai us kī razā maiñ kyā jānūñ

dayār-e-fikr pe taarī hai naza.a kā aalam

huuñ zinda laash zamīñ par duā maiñ kyā jānūñ

azal se aaj talak baT rahā huuñ qistoñ meñ

milegī is se bhī baḌh kar sazā maiñ kyā jānūñ

hai mere dil meñ bhī hasrat kahūñ anal-haq maiñ

nasīb hogī kab us kī razā maiñ kyā jānūñ

hayāt rishta-e-zanjīr meñ hai simTī huī

najāt degā mujhe kab ḳhudā maiñ kyā jānūñ

hadoñ se apnī guzarne kī zid pe qaa.em hai

samajh se baalā hai us kī adā maiñ kyā jānūñ

'asar' maiñ sun to rahā huuñ havā kī sargoshī

kahīñ badal hī na jaa.e fazā maiñ kyā jānūñ

fana ki samt chala hun baqa main kya jaanun

ye kaisi baat hai us ki raza main kya jaanun

dayar-e-fikr pe tari hai naza ka aalam

hun zinda lash zamin par dua main kya jaanun

azal se aaj talak baT raha hun qiston mein

milegi is se bhi baDh kar saza main kya jaanun

hai mere dil mein bhi hasrat kahun anal-haq main

nasib hogi kab us ki raza main kya jaanun

hayat rishta-e-zanjir mein hai simTi hui

najat dega mujhe kab KHuda main kya jaanun

hadon se apni guzarne ki zid pe qaem hai

samajh se baala hai us ki ada main kya jaanun

'asar' main sun to raha hun hawa ki sargoshi

kahin badal hi na jae faza main kya jaanun