faqat aasaniyan hotin to aasani se mar jate

faqat āsāniyāñ hotīñ to āsānī se mar jaate

pareshāñ gar nahīñ hote pareshānī se mar jaate

ḳhudā kā shukr hai tum se mile the ḳhvāb meñ varna

haqīqat meñ ye sab hotā to hairānī se mar jaate

ye sab mahrūm jiite haiñ kisī ummīd-e-fardā par

inheñ sab kuchh hī mil jaatā farāvānī se mar jaate

ham ahl-e-dasht ko mushkil-pasandī raas aatī hai

koī mushkil nahīñ hotī tan-āsānī se mar jaate

ḳhirad ne umr bhar hī imtihānoñ meñ rakhā ham ko

'saġhīr' is se to achchhā thā ki nādānī se mar jaate

faqat aasaniyan hotin to aasani se mar jate

pareshan gar nahin hote pareshani se mar jate

KHuda ka shukr hai tum se mile the KHwab mein warna

haqiqat mein ye sab hota to hairani se mar jate

ye sab mahrum jite hain kisi ummid-e-farda par

inhen sab kuchh hi mil jata farawani se mar jate

hum ahl-e-dasht ko mushkil-pasandi ras aati hai

koi mushkil nahin hoti tan-asani se mar jate

KHirad ne umr bhar hi imtihanon mein rakha hum ko

'saghir' is se to achchha tha ki nadani se mar jate