faqat kaghaz pe likha bar-e-aziyat utra

faqat kāġhaz pe likhā bār-e-azīyat utrā

jab ġhazal kah lī to zañgār-e-tabī.at utrā

bhuuk se marte rahe ḳhema-e-aflās meñ log

āsmāñ se na magar ḳhvāncha-e-nemat utrā

maañ ne tāvīz bhī bāñdhā mire baazū pe magar

phir bhī sar se na ye saudā-e-mohabbat utrā

dil-sarā.e meñ tamannā.eñ haiñ sar nehūḌā.e

kaun bastī meñ vo mehmān-e-masarrat utrā

apne qad kī use pahchān bahut mushkil thī

sar se jab turra-e-dastār-e-fazīlat utrā

maiñ na ġham-ḳhvār-e-shahanshā na talab-gār-e-kul

mujh pe kis vāste āshob-e-qayāmat utrā

bānu-e-shahr-e-adab ke liye is ahd meñ harf

kitnā be-māyā-o-mahrūm-e-sadāqat utrā

sar kī fasloñ ko bachā le ga.e sab log magar

ek 'mohsin' sar-e-maidān-e-hilākat utrā

faqat kaghaz pe likha bar-e-aziyat utra

jab ghazal kah li to zangar-e-tabiat utra

bhuk se marte rahe KHema-e-aflas mein log

aasman se na magar KHwancha-e-nemat utra

man ne tawiz bhi bandha mere bazu pe magar

phir bhi sar se na ye sauda-e-mohabbat utra

dil-sarae mein tamannaen hain sar nehuDae

kaun basti mein wo mehman-e-masarrat utra

apne qad ki use pahchan bahut mushkil thi

sar se jab turra-e-dastar-e-fazilat utra

main na gham-KHwar-e-shahansha na talab-gar-e-kul

mujh pe kis waste aashob-e-qayamat utra

banu-e-shahr-e-adab ke liye is ahd mein harf

kitna be-maya-o-mahrum-e-sadaqat utra

sar ki faslon ko bacha le gae sab log magar

ek 'mohsin' sar-e-maidan-e-hilakat utra