faqih-e-shahr ka lahja hai pur-jalal bahut

faqīh-e-shahr kā lahja hai pur-jalāl bahut

tabhī to shahr meñ phailā hai ishti.āl bahut

vo ek shaḳhs ki mahrūm-e-shāna-o-sar hai

use hai jubba-o-dastār kā ḳhayāl bahut

vo pahle aag lagātā hai phir bujhātā hai

use hai sho.abda-bāzī meñ bhī kamāl bahut

amīr-e-shahr kī saarī tijoriyāñ ḳhālī

gadā-e-shahr ke kashkol meñ hai maal bahut

muhāfizoñ kī zarūrat tumhāre jaisoñ ko

hamāre jaisoñ ko apne badan kī Dhaal bahut

kahāñ se siikh ke aa.e ho guftugū kā hunar

uThā rahe ho sar-e-bazm tum savāl bahut

usī ke haath pe bai.at usī se ahd-e-vafā

tumheñ yazīd kā jis par thā ehtimāl bahut

fazā meñ uḌte parindoñ ko bhī nahīñ ma.alūm

ki bāġhbāñ ne bichhā.e haiñ ab ke jaal bahut

jo ho rahā hai tamāshā vahī dikhātā hai

kalām hotā hai 'nāsir' kā hasb-e-hāl bahut

faqih-e-shahr ka lahja hai pur-jalal bahut

tabhi to shahr mein phaila hai ishtial bahut

wo ek shaKHs ki mahrum-e-shana-o-sar hai

use hai jubba-o-dastar ka KHayal bahut

wo pahle aag lagata hai phir bujhata hai

use hai shoabda-bazi mein bhi kamal bahut

amir-e-shahr ki sari tijoriyan KHali

gada-e-shahr ke kashkol mein hai mal bahut

muhafizon ki zarurat tumhaare jaison ko

hamare jaison ko apne badan ki Dhaal bahut

kahan se sikh ke aae ho guftugu ka hunar

uTha rahe ho sar-e-bazm tum sawal bahut

usi ke hath pe baiat usi se ahd-e-wafa

tumhein yazid ka jis par tha ehtimal bahut

faza mein uDte parindon ko bhi nahin malum

ki baghban ne bichhae hain ab ke jal bahut

jo ho raha hai tamasha wahi dikhata hai

kalam hota hai 'nasir' ka hasb-e-haal bahut