faqir-KHak-nashin the kisi ko kya dete

faqīr-ḳhāk-nashīñ the kisī ko kyā dete

magar yahī ki vo miltā to ham du'ā dete

galī galī meñ pukārā nagar nagar ghūme

kahāñ kahāñ na phire tujh ko ham sadā dete

lagī ye dil kī bhalā āñsuoñ se kyā bujhtī

sarishk-e-dīda-e-ġham aur bhī havā dete

sunā hai ahl-e-hakam par girāñ thī merī navā

ye baat thī to mujhe bazm se uThā dete

ye kaam kam thā ye kār-e-payambarāna thā

ki ik charāġh sar-e-rahguzar jalā dete

javāb-e-pursish-e-ġham ke hazār pahlū haiñ

ham apne hosh meñ hote to muskurā dete

ġhubār-e-rāh nahīñ the ki baiTh jaate ham

guzar ga.e hameñ āvāz naqsh-e-pā dete

gharoñ meñ aag lagā kar bhī kyā milā 'ḳhālid'

diloñ meñ aag lagī thī use bujhā dete

faqir-KHak-nashin the kisi ko kya dete

magar yahi ki wo milta to hum du'a dete

gali gali mein pukara nagar nagar ghume

kahan kahan na phire tujh ko hum sada dete

lagi ye dil ki bhala aansuon se kya bujhti

sarishk-e-dida-e-gham aur bhi hawa dete

suna hai ahl-e-hakam par giran thi meri nawa

ye baat thi to mujhe bazm se uTha dete

ye kaam kam tha ye kar-e-payambarana tha

ki ek charagh sar-e-rahguzar jala dete

jawab-e-pursish-e-gham ke hazar pahlu hain

hum apne hosh mein hote to muskura dete

ghubar-e-rah nahin the ki baiTh jate hum

guzar gae hamein aawaz naqsh-e-pa dete

gharon mein aag laga kar bhi kya mila 'KHalid'

dilon mein aag lagi thi use bujha dete