faragh-e-mehr-o-wafa se jo haT nahin sakta

farāġh-e-mehr-o-vafā se jo haT nahīñ saktā

kabhī samāj se millat se kaT nahīñ saktā

jo sidq-e-dil se tū kar de mirī satā.ish bhī

mujhe yaqīñ hai tirā qad bhī ghaT nahīñ saktā

havāla us kā kabhī mo'tabar nahīñ rahtā

jo aap apne usūloñ pe DaT nahīñ saktā

mire vajūd kī sab kirchiyāñ sañbhāl ke rakh

ki ab mazīd maiñ TukḌoñ meñ baT nahīñ saktā

kisī kā saath na ho to bahut hī mushkil hai

ye zindagī kā safar yūñhī kaT nahīñ saktā

ise 'amal ke pasīne kī bārishoñ se biThā

ġhubār-e-rāh du'āoñ se chhaT nahīñ saktā

bahū ko apnī hī beTī samajh le saas agar

to phir kisī pe bhī chūlhā ye phaT nahīñ saktā

faqat use hī pata hai maiñ kyā huuñ andar se

maiñ apnī zaat ke aage to DaT nahīñ saktā

aur ab to taḳht yā taḳhte kī baat hai 'ḳhālid'

maiñ aa gayā jo muqābil to haT nahīñ saktā

faragh-e-mehr-o-wafa se jo haT nahin sakta

kabhi samaj se millat se kaT nahin sakta

jo sidq-e-dil se tu kar de meri sataish bhi

mujhe yaqin hai tera qad bhi ghaT nahin sakta

hawala us ka kabhi mo'tabar nahin rahta

jo aap apne usulon pe DaT nahin sakta

mere wajud ki sab kirchiyan sanbhaal ke rakh

ki ab mazid main TukDon mein baT nahin sakta

kisi ka sath na ho to bahut hi mushkil hai

ye zindagi ka safar yunhi kaT nahin sakta

ise 'amal ke pasine ki barishon se biTha

ghubar-e-rah du'aon se chhaT nahin sakta

bahu ko apni hi beTi samajh le sas agar

to phir kisi pe bhi chulha ye phaT nahin sakta

faqat use hi pata hai main kya hun andar se

main apni zat ke aage to DaT nahin sakta

aur ab to taKHt ya taKHte ki baat hai 'KHalid'

main aa gaya jo muqabil to haT nahin sakta