faraaz-e-be-KHudi se tera tishna-lab nahin utra

farāz-e-be-ḳhudī se terā tishna-lab nahīñ utrā

abhī tak us kī āñkhoñ se ḳhumār-e-shab nahīñ utrā

zarā maiñ soch luuñ kyā kaam us ko aa paḌā mujh se

kabhī vo bām-e-tanhā.ī se be-matlab nahīñ utrā

mirī pursish ko aa pahuñchā hasīñ banda koī varna

falak se aaj tak merī madad ko rab nahīñ utrā

sitārā sā nazar aatā hai uupar se jahāñ paanī

maiñ ḳhush-fahmī ke is gahre kueñ meñ kab nahīñ utrā

pashemānī ke ba.ad us ko girā.ūñ kaise nazroñ se

ki jab vo bevafā thā mere dil se tab nahīñ utrā

kabhī sartāj mujh be-tāj ko sahvan kahā us ne

abhī tak mere sar se nashsha-e-mansab nahīñ utrā

tamannā hai ki chheḌūñ naġhma-e-insāniyat lekin

'qatīl' ab tak mire a.asāb se maz.hab nahīñ utrā

faraaz-e-be-KHudi se tera tishna-lab nahin utra

abhi tak us ki aankhon se KHumar-e-shab nahin utra

zara main soch lun kya kaam us ko aa paDa mujh se

kabhi wo baam-e-tanhai se be-matlab nahin utra

meri pursish ko aa pahuncha hasin banda koi warna

falak se aaj tak meri madad ko rab nahin utra

sitara sa nazar aata hai upar se jahan pani

main KHush-fahmi ke is gahre kuen mein kab nahin utra

pashemani ke baad us ko giraun kaise nazron se

ki jab wo bewafa tha mere dil se tab nahin utra

kabhi sartaj mujh be-taj ko sahwan kaha us ne

abhi tak mere sar se nashsha-e-mansab nahin utra

tamanna hai ki chheDun naghma-e-insaniyat lekin

'qatil' ab tak mere aasab se mazhab nahin utra