faraaz-e-dar pe ek din saja ke dekh hamein

farāz-e-dār pe ik din sajā ke dekh hameñ

hamīñ haiñ ahl-e-vafā aazmā ke dekh hameñ

ham ek naqsh-e-mohabbat haiñ tere dāman par

miTā sake to zamāne miTā ke dekh hameñ

hameñ bujhā ke añdheroñ meñ kyuuñ bhaTaktā hai

charāġh-e-rāh the ham phir jalā ke dekh hameñ

tujhe bhulāne kā vā'da to kar liyā ham ne

magar ye shart hai tū bhī bhulā ke dekh hameñ

ham ahl-e-fan to shagūfe haiñ rang o nik.hat ke

kisī gulāb kī sūrat ugā ke dekh hameñ

rulā ke ham ko sunā hai ki tū bhī rotā hai

hamāre sāmne aa phir rulā ke dekh hameñ

nazar na ā.eñge ham qahqahoñ kī mahfil meñ

jo dekhnā hai to aañsū bahā ke dekh hameñ

hamāre ḳhvāb-e-bahārāñ kī aabrū rakh le

kisī kalī kī tarah muskurā ke dekh hameñ

har ek ġham ko isī zid meñ bhuul jā.ūñgā

vo kah rahe haiñ ki 'razmī' bhulā ke dekh hameñ

faraaz-e-dar pe ek din saja ke dekh hamein

hamin hain ahl-e-wafa aazma ke dekh hamein

hum ek naqsh-e-mohabbat hain tere daman par

miTa sake to zamane miTa ke dekh hamein

hamein bujha ke andheron mein kyun bhaTakta hai

charagh-e-rah the hum phir jala ke dekh hamein

tujhe bhulane ka wa'da to kar liya hum ne

magar ye shart hai tu bhi bhula ke dekh hamein

hum ahl-e-fan to shagufe hain rang o nikhat ke

kisi gulab ki surat uga ke dekh hamein

rula ke hum ko suna hai ki tu bhi rota hai

hamare samne aa phir rula ke dekh hamein

nazar na aaenge hum qahqahon ki mahfil mein

jo dekhna hai to aansu baha ke dekh hamein

hamare KHwab-e-bahaaran ki aabru rakh le

kisi kali ki tarah muskura ke dekh hamein

har ek gham ko isi zid mein bhul jaunga

wo kah rahe hain ki 'razmi' bhula ke dekh hamein