fard ko asr ki raftar liye phirti hai

fard ko asr kī raftār liye phirtī hai

jins ko garmī-e-bāzār liye phirtī hai

par-e-parvāz se inkār nahīñ hai lekin

kījiye ġhaur to minqār liye phirtī hai

us kī qismat meñ rasā.ī na sahī āshiq ko

hasrat-e-lazzat-e-iz.hār liye phirtī hai

tālib-e-ilm ko idrāk-e-fazīlat ke bajā.e

ḳhvāhish-e-turra-o-dastār liye phirtī hai

donoñ Tāñgoñ kā ishāra hai ki gardish ham ko

har taraf sūrat-e-parkār liye phirtī hai

ek lamhe ke liye bhī nahīñ miltā hai sukūñ

gardish-e-gumbad-e-davvār liye phirtī hai

hathkaḌī jaise lagāte haiñ asīroñ ko vo zulf

kar ke halqe meñ giraftār liye phirtī hai

tauf meñ fart-e-tarab se hai zamīñ charḳh-e-zanāñ

sāya-e-gesū-o-ruḳhsār liye phirtī hai

jism ke bojh ko āġhāz se anjām talak

garche hai ruuh girāñ-bār liye phirtī hai

is ko Thahrā.e hue qasr-e-baqā kī buniyād

zindagī saañs kā ik taar liye phirtī hai

fard ko asr ki raftar liye phirti hai

jins ko garmi-e-bazar liye phirti hai

par-e-parwaz se inkar nahin hai lekin

kijiye ghaur to minqar liye phirti hai

us ki qismat mein rasai na sahi aashiq ko

hasrat-e-lazzat-e-izhaar liye phirti hai

talib-e-ilm ko idrak-e-fazilat ke bajae

KHwahish-e-turra-o-dastar liye phirti hai

donon Tangon ka ishaara hai ki gardish hum ko

har taraf surat-e-parkar liye phirti hai

ek lamhe ke liye bhi nahin milta hai sukun

gardish-e-gumbad-e-dawwar liye phirti hai

hathkaDi jaise lagate hain asiron ko wo zulf

kar ke halqe mein giraftar liye phirti hai

tauf mein fart-e-tarab se hai zamin charKH-e-zanan

saya-e-gesu-o-ruKHsar liye phirti hai

jism ke bojh ko aaghaz se anjam talak

garche hai ruh giran-bar liye phirti hai

is ko Thahrae hue qasr-e-baqa ki buniyaad

zindagi sans ka ek tar liye phirti hai