fareb de na kahin azm-e-mustaqil mera

fareb de na kahīñ azm-e-mustaqil merā

hujūm-e-yās se ghabrā na jaa.e dil merā

ye kis maqām pe pahuñchā diyā mohabbat ne

ki mere bas meñ nahīñ hai ḳhud aaj dil merā

mubārak aish kā māhaul ḳhush-nasīboñ ko

bahut hai mere liye dard-e-mustaqil merā

sun ai nigāh-e-mohabbat se rūThne vaale

tire ḳhayāl meñ gum hai sukūn-e-dil merā

mire gunāhoñ kā anjām sochne vaale

ye dekh kahtā hai kyā ashk-e-munfa.il merā

do-chār tinkoñ kī duniyā ‘ajīb duniyā thī

ki mutma.in thā har ik tarah jis meñ dil merā

umīd-e-lutf kisī aur se ho kyā 'hāmid'

huā na jab ki mohabbat meñ merā dil merā

fareb de na kahin azm-e-mustaqil mera

hujum-e-yas se ghabra na jae dil mera

ye kis maqam pe pahuncha diya mohabbat ne

ki mere bas mein nahin hai KHud aaj dil mera

mubarak aish ka mahaul KHush-nasibon ko

bahut hai mere liye dard-e-mustaqil mera

sun ai nigah-e-mohabbat se ruThne wale

tere KHayal mein gum hai sukun-e-dil mera

mere gunahon ka anjam sochne wale

ye dekh kahta hai kya ashk-e-munfail mera

do-chaar tinkon ki duniya ‘ajib duniya thi

ki mutmain tha har ek tarah jis mein dil mera

umid-e-lutf kisi aur se ho kya 'hamid'

hua na jab ki mohabbat mein mera dil mera