فریب حسن ترا اعتبار کر لیں گے

فریب حسن ترا اعتبار کر لیں گے

اسی طرح سے خزاں کو بہار کر لیں گے

ہمارا ساتھ اگر دے گئی حیات اے دوست

تو حشر تک بھی ترا انتظار کر لیں گے

ہم اجنبی کی طرح تیری بزم میں بیٹھیں

یہ جبر ہوگا مگر اختیار کر لیں گے

کرم کی بھیک نہ مانگیں گے ہم زمانے سے

حیات صرف غم روزگار کر لیں گے

گلوں سے بڑھ کے حسیں ہوں گے راہ میں کانٹے

ہمارے پاؤں کے چھالے جو پیار کر لیں گے

وہ ہم سفر ہیں اگر یہ گماں بھی ہو جائے

رہ حیات کو ہم خوش گوار کر لیں گے

ابھی تو اپنے ہی دامن سے شوقؔ الجھے ہیں

کبھی تصور دامان یار کر لیں گے