fareb-e-husn tera eatibar kar lenge

fareb-e-husn tirā e.atibār kar leñge

isī tarah se ḳhizāñ ko bahār kar leñge

hamārā saath agar de ga.ī hayāt ai dost

to hashr tak bhī tirā intizār kar leñge

ham ajnabī kī tarah terī bazm meñ baiTheñ

ye jabr hogā magar iḳhtiyār kar leñge

karam kī bhiik na māñgeñge ham zamāne se

hayāt sarf-e-ġham-e-rozgār kar leñge

guloñ se baḌh ke hasīñ hoñge raah meñ kāñTe

hamāre paañv ke chhāle jo pyaar kar leñge

vo ham-safar haiñ agar ye gumāñ bhī ho jaa.e

rah-e-hayāt ko ham ḳhush-gavār kar leñge

abhī to apne hī dāman se 'shauq' uljhe haiñ

kabhī tasavvur-e-dāmān-e-yār kar leñge

fareb-e-husn tera eatibar kar lenge

isi tarah se KHizan ko bahaar kar lenge

hamara sath agar de gai hayat ai dost

to hashr tak bhi tera intizar kar lenge

hum ajnabi ki tarah teri bazm mein baiThen

ye jabr hoga magar iKHtiyar kar lenge

karam ki bhik na mangenge hum zamane se

hayat sarf-e-gham-e-rozgar kar lenge

gulon se baDh ke hasin honge rah mein kanTe

hamare panw ke chhaale jo pyar kar lenge

wo ham-safar hain agar ye guman bhi ho jae

rah-e-hayat ko hum KHush-gawar kar lenge

abhi to apne hi daman se 'shauq' uljhe hain

kabhi tasawwur-e-daman-e-yar kar lenge