fareb-e-kasrat-e-jalwa se aashna hun main

fareb-e-kasrat-e-jalva se āshnā huuñ maiñ

tirī qasam tujhe tanhā hī dekhtā huuñ maiñ

qubūl jo nahīñ hotī vo iltijā huuñ maiñ

kabhī jo bar nahīñ aatā vo mudda.ā huuñ maiñ

mujhe na chheḌ dukhe dil kā tājirā huuñ maiñ

tamām qissa-e-nākāmī-e-vafā huuñ maiñ

matā.a-e-ām nahīñ jins-e-be-bahā huuñ maiñ

parakhne vaale parakh jauhar-e-vafā huuñ maiñ

rasā.iyāñ mirī mahdūd haiñ mire dil tak

lab-āshnā nahīñ vo āh-e-nā-rasā huuñ maiñ

mirī hayāt-e-mohabbat hai be-kasī kī hayāt

ḳhud apne haal ko bhī ġhair pā rahā huuñ maiñ

vo rāz-e-fāsh huuñ jis par nazar nahīñ paḌtī

junūñ kā bhes hai aur ishq-e-barmalā huuñ maiñ

ruḳh-e-hazīñ se numāyāñ hai ḳhastagī dil kī

shikast-e-rang-e-tamannā kā aa.ina huuñ maiñ

na koī raah hai merī na koī manzil hai

fazā meñ khoī huī duur kī sadā huuñ maiñ

kahāñ pe dekhiye le jaa.e ishq kī azmat

abhī to daur-e-vafā se guzar rahā huuñ maiñ

bahār-e-gul ki shafaq kā ho manzar-e-rangīñ

tirā hī naqsh-e-tabassum hai jāntā huuñ maiñ

ḳhudā kare ki ye lamhe abad se mil jaa.eñ

vo ashk pūchhte jaate haiñ ro rahā huuñ maiñ

jo tiir ban ke kaleje ke paar hotī hai

shikast-e-sāz kī vo āḳhirī sadā huuñ maiñ

jagah hai mere liye ḳhaas qalb-e-qudrat meñ

dil-e-ġharīb se niklī huī duā huuñ maiñ

'sarosh' mashq-e-gunah bhī kabhī kabhī varna

ḳhudī na baḌh ke ye kahne lage ḳhudā huuñ maiñ

fareb-e-kasrat-e-jalwa se aashna hun main

teri qasam tujhe tanha hi dekhta hun main

qubul jo nahin hoti wo iltija hun main

kabhi jo bar nahin aata wo muddaa hun main

mujhe na chheD dukhe dil ka tajira hun main

tamam qissa-e-nakaami-e-wafa hun main

mataa-e-am nahin jins-e-be-baha hun main

parakhne wale parakh jauhar-e-wafa hun main

rasaiyan meri mahdud hain mere dil tak

lab-ashna nahin wo aah-e-na-rasa hun main

meri hayat-e-mohabbat hai be-kasi ki hayat

KHud apne haal ko bhi ghair pa raha hun main

wo raaz-e-fash hun jis par nazar nahin paDti

junun ka bhes hai aur ishq-e-barmala hun main

ruKH-e-hazin se numayan hai KHastagi dil ki

shikast-e-rang-e-tamanna ka aaina hun main

na koi rah hai meri na koi manzil hai

faza mein khoi hui dur ki sada hun main

kahan pe dekhiye le jae ishq ki azmat

abhi to daur-e-wafa se guzar raha hun main

bahaar-e-gul ki shafaq ka ho manzar-e-rangin

tera hi naqsh-e-tabassum hai jaanta hun main

KHuda kare ki ye lamhe abad se mil jaen

wo ashk puchhte jate hain ro raha hun main

jo tir ban ke kaleje ke par hoti hai

shikast-e-saz ki wo aaKHiri sada hun main

jagah hai mere liye KHas qalb-e-qudrat mein

dil-e-gharib se nikli hui dua hun main

'sarosh' mashq-e-gunah bhi kabhi kabhi warna

KHudi na baDh ke ye kahne lage KHuda hun main