فریب شوق میں آ کر سکون پا نہ سکا

فریب شوق میں آ کر سکون پا نہ سکا

وہ چوٹ کھائی کہ جس کو کبھی بھلا نہ سکا

یہ سلسلہ رہے قائم جفا کی عمر دراز

کہ تیرے ناز کوئی بوالہوس اٹھا نہ سکا

فریب کار زمانے میں حسرتوں کا چراغ

بجھانے والے بہت تھے کوئی جلا نہ سکا

پھنسا گئی مجھے الجھن میں یوں ادائے سکوت

کہ اپنی تشنگیٔ شوق بھی بجھا نہ سکا

مجھے تو اس کا ہے رونا کہ رو نہیں سکتا

شکایت اس کی نہیں ہے کہ مسکرا نہ سکا

نقوش‌ ہستیٔ فانی بنے مٹے لیکن

لکیریں اپنے مقدر کی میں مٹا نہ سکا

نوابؔ خوش ہے اسی پر کہ ہو گیا تیرا

یہ غم نہیں ہے کہ اپنا تجھے بنا نہ سکا