fareb-e-ulfat ki dastan mein asar ki ummid hi kahan hai

fareb-e-ulfat kī dāstāñ meñ asar kī ummīd hī kahāñ hai

abhī to mujh ko isī meñ shak hai yaqīñ yaqīñ hai gumāñ gumāñ hai

mujhī tak un kī jafā na samjho ye imtihāñ hai vo imtihāñ hai

vahīñ qayāmat kā sāmnā hai vafā kī manzil jahāñ jahāñ hai

nisāb-e-ulfat se be-ḳhabar hai sanad nahīñ bul-havas kā da.avā

jo lafz merī zabāñ se nikle vahī mohabbat kī dāstāñ hai

kahāñ pahuñch kī aarzū hai tumhāre naqsh-e-qadam pe chal kar

tum apne dil se patā lagāo mirī tamannā kī had kahāñ hai

fareb ban kar nashāt-e-dil kā rahegā kab tak ye aish-e-rafta

badal chukā karvaTeñ zamāna mirī nazar meñ vahī samāñ hai

idhar umañgoñ kī lahar dil meñ udhar javānī kī ḳhud-numā.ī

paḌe haiñ ik kashmakash meñ donoñ mazāq-e-fitrat kā imtihāñ hai

tumhārī ġhaflat-shi.āriyoñ ne vo gul khilā.e ki rañg badlā

qafas kī buniyād rakhne vaale ḳhizāñ ke qabze meñ āshiyāñ hai

palaT gayā 'jurm' ruḳh havā kā haiñ aise āsār ab huvaidā

bahār aa.e na ba.ad jis ke chaman meñ vo mahshar-e-ḳhizāñ hai

fareb-e-ulfat ki dastan mein asar ki ummid hi kahan hai

abhi to mujh ko isi mein shak hai yaqin yaqin hai guman guman hai

mujhi tak un ki jafa na samjho ye imtihan hai wo imtihan hai

wahin qayamat ka samna hai wafa ki manzil jahan jahan hai

nisab-e-ulfat se be-KHabar hai sanad nahin bul-hawas ka dawa

jo lafz meri zaban se nikle wahi mohabbat ki dastan hai

kahan pahunch ki aarzu hai tumhaare naqsh-e-qadam pe chal kar

tum apne dil se pata lagao meri tamanna ki had kahan hai

fareb ban kar nashat-e-dil ka rahega kab tak ye aish-e-rafta

badal chuka karwaTen zamana meri nazar mein wahi saman hai

idhar umangon ki lahar dil mein udhar jawani ki KHud-numai

paDe hain ek kashmakash mein donon mazaq-e-fitrat ka imtihan hai

tumhaari ghaflat-shiariyon ne wo gul khilae ki rang badla

qafas ki buniyaad rakhne wale KHizan ke qabze mein aashiyan hai

palaT gaya 'jurm' ruKH hawa ka hain aise aasar ab huwaida

bahaar aae na baad jis ke chaman mein wo mahshar-e-KHizan hai