fareb-e-zauq ko har rang mein ayan dekha

fareb-e-zauq ko har rañg meñ ayaañ dekhā

jahāñ jahāñ tujhe DhūñDhā vahāñ vahāñ dekhā

vahī hai dasht-e-junūñ aur vahī hai tanhā.ī

tire fareb ko ai gard-e-kārvāñ dekhā

hai barq ko bhī koī laag nā-murādoñ se

girī taḌap ke jahāñ us ne āshiyāñ dekhā

junūñ ne hāfiza barbād kar diyā apnā

kuchh ab to yaad nahīñ hai kise kahāñ dekhā

ajab ye dil hai jise bāvajūd tanhā.ī

ghirā huā tire jalvoñ ke darmiyāñ dekhā

vahīñ vahīñ tire jalvoñ ne aag bhaḌkā.ī

jahāñ jahāñ koī be-nām-o-be-nishāñ dekhā

tilism-e-soz-e-mohabbat kī garmiyāñ tauba

ki ham ne ashk ke paanī meñ bhī dhuāñ dekhā

galī meñ un kī qadam rakh ke saḳht hairāñ huuñ

yahāñ zamīñ ko bhī ham-rañg āsmāñ dekhā

lagā dī jaan kī baazī ġham-e-mohabbat ne

jab un ke husn kā saudā bahut garāñ dekhā

hazār baar sune ham ne ishq ke naale

magar kisī ne jo dekhā to be-zabāñ dekhā

fareb-e-zauq ko har rang mein ayan dekha

jahan jahan tujhe DhunDha wahan wahan dekha

wahi hai dasht-e-junun aur wahi hai tanhai

tere fareb ko ai gard-e-karwan dekha

hai barq ko bhi koi lag na-muradon se

giri taDap ke jahan us ne aashiyan dekha

junun ne hafiza barbaad kar diya apna

kuchh ab to yaad nahin hai kise kahan dekha

ajab ye dil hai jise bawajud tanhai

ghira hua tere jalwon ke darmiyan dekha

wahin wahin tere jalwon ne aag bhaDkai

jahan jahan koi be-nam-o-be-nishan dekha

tilism-e-soz-e-mohabbat ki garmiyan tauba

ki hum ne ashk ke pani mein bhi dhuan dekha

gali mein un ki qadam rakh ke saKHt hairan hun

yahan zamin ko bhi ham-rang aasman dekha

laga di jaan ki bazi gham-e-mohabbat ne

jab un ke husn ka sauda bahut garan dekha

hazar bar sune hum ne ishq ke nale

magar kisi ne jo dekha to be-zaban dekha