فریب جھوٹ دغا ہے ہماری بستی میں

فریب جھوٹ دغا ہے ہماری بستی میں

یہ کیسا زہر گھلا ہے ہماری بستی میں

چراغ بن کے جو سب کے دلوں میں روشن تھا

اسی کا گھر تو جلا ہے ہماری بستی میں

میں کیا بتاؤں میاں کون خیریت سے ہے

سبھی کا حال برا ہے ہماری بستی میں

انہیں بھروسہ ہے تیر و کمان پر اپنے

ہمیں یقیں ہے خدا ہے ہماری بستی میں

ہزار ڈھونڈئیے بندہ کوئی نہیں ملتا

ہر ایک شخص خدا ہے ہماری بستی میں

ہر ایک آنکھ میں آنسو ہر ایک لب پہ فغاں

یہ کیسی آب و ہوا ہے ہماری بستی میں

وقارؔ آج تلک بھی سمجھ نہ پائے ہم

کہ کون کس پہ فدا ہے ہماری بستی میں