farhad kis umid pe lata hai ju-e-shir

farhād kis umiid pe laatā hai jū-e-shīr

vaañ ḳhuun kī havas hai nahīñ ārzū-e-shīr

hai us javāñ kī baat meñ ab to lahū kī baas

ve din ga.e ki aatī thī us muñh se bū-e-shīr

hote hī sub.h aah gayā māh-e-chār-dah

sābit huā mujhe ki namak hai adū-e-shīr

hasrat hī dil meñ kohkan āḳhir ye le gayā

shīrīñ ne apnī āñkhoñ bhī dekhā na rū-e-shīr

us duudh kā ḳhudā kare kaasa hameñ nasīb

jannat meñ panj-tan kī jo bahtī hai jū-e-shīr

'āshiq haiñ apne ḳhūn-e-jigar-ḳhvār zahr-nosh

raġhbat taraf shakar ke hai un ko na sū-e-shīr

jin ko baġhair sa'ī vo shīrīñ-dahan mile

kho deñ na koh vo na kareñ justujū-e-shīr

milte hī us se dil kī girah mere khul ga.ī

'uqde shakar ke jaise khuleñ rū-ba-rū-e-shīr

phir duudh kī buḌhāpe meñ aave na muñh se baas

āḳhir kahāñ talak ye 'bayāñ' guftugū-e-shīr

farhad kis umid pe lata hai ju-e-shir

wan KHun ki hawas hai nahin aarzu-e-shir

hai us jawan ki baat mein ab to lahu ki bas

we din gae ki aati thi us munh se bu-e-shir

hote hi subh aah gaya mah-e-chaar-dah

sabit hua mujhe ki namak hai adu-e-shir

hasrat hi dil mein kohkan aaKHir ye le gaya

shirin ne apni aankhon bhi dekha na ru-e-shir

us dudh ka KHuda kare kasa hamein nasib

jannat mein panj-tan ki jo bahti hai ju-e-shir

'ashiq hain apne KHun-e-jigar-KHwar zahr-nosh

raghbat taraf shakar ke hai un ko na su-e-shir

jin ko baghair sa'i wo shirin-dahan mile

kho den na koh wo na karen justuju-e-shir

milte hi us se dil ki girah mere khul gai

'uqde shakar ke jaise khulen ru-ba-ru-e-shir

phir dudh ki buDhape mein aawe na munh se bas

aaKHir kahan talak ye 'bayan' guftugu-e-shir