farhat-e-bu-e-saman nikhat-e-raihan-e-ghazal

farhat-e-bū-e-saman nik.hat-e-raihān-e-ġhazal

tujh se raushan hai mirī sham.a-e-shabistān-e-ġhazal

bū-e-gul le ke sabā aa.ī ghaTā.eñ chhā.īñ

phir uThā qulzum-e-jazbāt meñ tūfān-e-ġhazal

āsmāñ chāñd sitāroñ se sajā sham.a jalī

shaam kyā aa.ī ki raushan huā aivān-e-ġhazal

zulm hai reshmīñ ehsās pe ḳhanjar rakhnā

nukta-chīñ hosh ki nāzuk hai rag-e-jān-e-ġhazal

zarra sahrā hai yahāñ qatra samundar hai yahāñ

koī dekhe to zarā vus.at-e-dāmān-e-ġhazal

dil mirā pech-o-ḳham-e-gesu-e-urdū kā asiir

fan mirā shāna-kash-e-zulf-e-pareshān-e-ġhazal

zaḳhm khā jaa.e rag-e-gul se ajab kyā hai 'ayāz'

vo jo mahsūs kare siine meñ paikān-e-ġhazal

farhat-e-bu-e-saman nikhat-e-raihan-e-ghazal

tujh se raushan hai meri shama-e-shabistan-e-ghazal

bu-e-gul le ke saba aai ghaTaen chhain

phir uTha qulzum-e-jazbaat mein tufan-e-ghazal

aasman chand sitaron se saja shama jali

sham kya aai ki raushan hua aiwan-e-ghazal

zulm hai reshmin ehsas pe KHanjar rakhna

nukta-chin hosh ki nazuk hai rag-e-jaan-e-ghazal

zarra sahra hai yahan qatra samundar hai yahan

koi dekhe to zara wusat-e-daman-e-ghazal

dil mera pech-o-KHam-e-gesu-e-urdu ka asir

fan mera shana-kash-e-zulf-e-pareshan-e-ghazal

zaKHm kha jae rag-e-gul se ajab kya hai 'ayaz'

wo jo mahsus kare sine mein paikan-e-ghazal