فرحت بوئے سمن نکہت ریحان غزل

فرحت بوئے سمن نکہت ریحان غزل

تجھ سے روشن ہے مری شمع شبستان غزل

بوئے گل لے کے صبا آئی گھٹائیں چھائیں

پھر اٹھا قلزم جذبات میں طوفان غزل

آسماں چاند ستاروں سے سجا شمع جلی

شام کیا آئی کہ روشن ہوا ایوان غزل

ظلم ہے ریشمیں احساس پہ خنجر رکھنا

نکتہ چیں ہوش کہ نازک ہے رگ جان غزل

ذرہ صحرا ہے یہاں قطرہ سمندر ہے یہاں

کوئی دیکھے تو ذرا وسعت دامان غزل

دل مرا پیچ و خم گیسوئے اردو کا اسیر

فن مرا شانہ کش زلف پریشان غزل

زخم کھا جائے رگ گل سے عجب کیا ہے ایازؔ

وہ جو محسوس کرے سینے میں پیکان غزل