badan aur ruh mein jhagDa paDa hai

badan aur ruuh meñ jhagḌā paḌā hai

ki hissa ishq meñ kis kā baḌā hai

hujūm-e-girya se huuñ dar-ba-dar maiñ

ki ghar meñ sar talak paanī khaḌā hai

bulātī hai mujhe dīvār-e-duniyā

jahāñ har jism īñToñ sā jaḌā hai

jhiñjhoḌā hai abhī kis zalzale ne

zamīñ se zindagī sā kyā jhaḌā hai

faqat āñkheñ hī āñkheñ rah ga.ī haiñ

ki saarā shahr miTTī meñ gaḌā hai

tumhārā aks hai yā aks-e-duniyā

tazabzub sā kuchh āñkhoñ meñ paḌā hai

maiñ dariyā jaañ bachātā phir rahā huuñ

koī sāhil mire pīchhe paḌā hai

zarā sī sharm bhī kar farhat-'ehsās'

badan terā ajab chiknā ghaḌā hai

badan aur ruh mein jhagDa paDa hai

ki hissa ishq mein kis ka baDa hai

hujum-e-girya se hun dar-ba-dar main

ki ghar mein sar talak pani khaDa hai

bulati hai mujhe diwar-e-duniya

jahan har jism inTon sa jaDa hai

jhinjhoDa hai abhi kis zalzale ne

zamin se zindagi sa kya jhaDa hai

faqat aankhen hi aankhen rah gai hain

ki sara shahr miTTi mein gaDa hai

tumhaara aks hai ya aks-e-duniya

tazabzub sa kuchh aankhon mein paDa hai

main dariya jaan bachata phir raha hun

koi sahil mere pichhe paDa hai

zara si sharm bhi kar farhat-'ehsas'

badan tera ajab chikna ghaDa hai