ghar banane mein tamam ahl-e-safar lag gae hain

ghar banāne meñ tamām ahl-e-safar lag ga.e haiñ

kyā tamāshe ye sar-e-rāhguzar lag ga.e haiñ

toḌ kar band-e-qabā jism uḌā jaatā hai

kaise is ḳhaak kī dīvār ko par lag ga.e haiñ

sirf ik tujh se bichhaḌne kā nahīñ ḳhauf hameñ

saath meñ ab ke ka.ī aur bhī Dar lag ga.e haiñ

sabza-e-mutazir is darja numū ko pahuñchā

dekh ham dar pe tire misl-e-shajar lag ga.e haiñ

jashn-e-girya to kiyā thā mirī āñkhoñ ne shurūa

saath ab shahr ke sab dīda-e-tar lag ga.e haiñ

kaisī afvāh uḌī tujh se mire rishte kī

sab tire chāhne vaale mire ghar lag ga.e haiñ

husn to hai hī na.ī tarah se ātish-añgez

aa.ine ko bhī na.e barq-o-sharar lag ga.e haiñ

kārḳhāna hai usī husn kā aalam saarā

bas jidhar us ne lagāyā hai udhar lag ga.e haiñ

jis kī pādāsh meñ hai dar-ba-darī kā ye itaab

phir usī kaam pe ham shahr-badar lag ga.e haiñ

'farhat-ehsās' maiñ kyā dekhā jo us ke pīchhe

āñkheñ dikhlāte hue ahl-e-nazar lag ga.e haiñ

ghar banane mein tamam ahl-e-safar lag gae hain

kya tamashe ye sar-e-rahguzar lag gae hain

toD kar band-e-qaba jism uDa jata hai

kaise is KHak ki diwar ko par lag gae hain

sirf ek tujh se bichhaDne ka nahin KHauf hamein

sath mein ab ke kai aur bhi Dar lag gae hain

sabza-e-mutazir is darja numu ko pahuncha

dekh hum dar pe tere misl-e-shajar lag gae hain

jashn-e-girya to kiya tha meri aankhon ne shurua

sath ab shahr ke sab dida-e-tar lag gae hain

kaisi afwah uDi tujh se mere rishte ki

sab tere chahne wale mere ghar lag gae hain

husn to hai hi nai tarah se aatish-angez

aaine ko bhi nae barq-o-sharar lag gae hain

karKHana hai usi husn ka aalam sara

bas jidhar us ne lagaya hai udhar lag gae hain

jis ki padash mein hai dar-ba-dari ka ye itab

phir usi kaam pe hum shahr-badar lag gae hain

'farhat-ehsas' main kya dekha jo us ke pichhe

aankhen dikhlate hue ahl-e-nazar lag gae hain