farishte imtihan-e-bandagi mein humse kam nikle

farishte imtihān-e-bandagī meñ ham se kam nikle

magar ik jurm kī pādāsh meñ jannat se ham nikle

ġham-e-duniyā-o-dīñ un ko na fikr-e-nek-o-bad un ko

mohabbat karne vaale be-niyāz-e-besh-o-kam nikle

ġharaz ka.abe se thī jin ko na thā matlab kalīsā se

had-e-dair-o-haram se bhī vo aage do-qadam nikle

sahar kī manzil-e-raushan pe jā pahuñche vo dīvāne

shab-e-tārīk meñ jo nuur kā le kar alam nikle

mah-o-ḳhurshīd ban kar āsmānoñ par hue raushan

do aañsū vo mirī āñkhoñ se jo shām-e-alam nikle

sukūt-e-shab meñ ham ne ek rañgīñ ḳhvāb dekhā thā

masarrat jāvedāñ hogī agar ta.abīr-e-ġham nikle

na miltī hoñ sharāb-e-zindagī kī talḳhiyāñ jin meñ

sunā hai vo 'ziyā' ke dil se aise sher kam nikle

farishte imtihan-e-bandagi mein hum se kam nikle

magar ek jurm ki padash mein jannat se hum nikle

gham-e-duniya-o-din un ko na fikr-e-nek-o-bad un ko

mohabbat karne wale be-niyaz-e-besh-o-kam nikle

gharaz kabe se thi jin ko na tha matlab kalisa se

had-e-dair-o-haram se bhi wo aage do-qadam nikle

sahar ki manzil-e-raushan pe ja pahunche wo diwane

shab-e-tarik mein jo nur ka le kar alam nikle

mah-o-KHurshid ban kar aasmanon par hue raushan

do aansu wo meri aankhon se jo sham-e-alam nikle

sukut-e-shab mein hum ne ek rangin KHwab dekha tha

masarrat jawedan hogi agar tabir-e-gham nikle

na milti hon sharab-e-zindagi ki talKHiyan jin mein

suna hai wo 'ziya' ke dil se aise sher kam nikle