farishton se bhi achchha main bura hone se pahle tha

farishtoñ se bhī achchhā maiñ burā hone se pahle thā

vo mujh se intihā.ī ḳhush ḳhafā hone se pahle thā

kiyā karte the bāteñ zindagī-bhar saath dene kī

magar ye hausla ham meñ judā hone se pahle thā

haqīqat se ḳhayāl achchhā hai bedārī se ḳhvāb achchhā

tasavvur meñ vo kaisā sāmnā hone se pahle thā

agar ma.adūm ko maujūd kahne meñ ta.ammul hai

to jo kuchh bhī yahāñ hai aaj kyā hone se pahle thā

kisī bichhḌe hue kā lauT aanā ġhair-mumkin hai

mujhe bhī ye gumāñ ik tajraba hone se pahle thā

'shu.ūr' is se hameñ kyā intihā ke baa'd kyā hogā

bahut hogā to vo jo ibtidā hone se pahle thā

farishton se bhi achchha main bura hone se pahle tha

wo mujh se intihai KHush KHafa hone se pahle tha

kiya karte the baaten zindagi-bhar sath dene ki

magar ye hausla hum mein juda hone se pahle tha

haqiqat se KHayal achchha hai bedari se KHwab achchha

tasawwur mein wo kaisa samna hone se pahle tha

agar madum ko maujud kahne mein tammul hai

to jo kuchh bhi yahan hai aaj kya hone se pahle tha

kisi bichhDe hue ka lauT aana ghair-mumkin hai

mujhe bhi ye guman ek tajraba hone se pahle tha

'shuur' is se hamein kya intiha ke ba'd kya hoga

bahut hoga to wo jo ibtida hone se pahle tha