fariyaad bhi hai su-e-adab apne shahr mein

fariyād bhī hai sū-e-adab apne shahr meñ

ham phir rahe haiñ mohr-ba-lab apne shahr meñ

ab kyā dayār-e-ġhair meñ DhūñDeñ ham āshnā

apne to ġhair ho ga.e sab apne shahr meñ

ab imtiyāz-e-dushmanī-o-dostī kise

hālāt ho ga.e haiñ ajab apne shahr meñ

jo phuul aayā sabz qadam ho ke rah gayā

kab fasl-e-gul hai fasl-e-tarab apne shahr meñ

jo rāñda-e-zamāna the ab shahryār haiñ

kis ko ḳhayāl-e-nām-o-nasab apne shahr meñ

ik aap haiñ ki saarā zamāna hai aap kā

ik ham ki ajnabī hue ab apne shahr meñ

'ḳhātir' ab ahl-e-dil bhī bane haiñ zamāna-sāz

kis se kareñ vafā kī talab apne shahr meñ

fariyaad bhi hai su-e-adab apne shahr mein

hum phir rahe hain mohr-ba-lab apne shahr mein

ab kya dayar-e-ghair mein DhunDen hum aashna

apne to ghair ho gae sab apne shahr mein

ab imtiyaz-e-dushmani-o-dosti kise

haalat ho gae hain ajab apne shahr mein

jo phul aaya sabz qadam ho ke rah gaya

kab fasl-e-gul hai fasl-e-tarab apne shahr mein

jo randa-e-zamana the ab shahryar hain

kis ko KHayal-e-nam-o-nasab apne shahr mein

ek aap hain ki sara zamana hai aap ka

ek hum ki ajnabi hue ab apne shahr mein

'KHatir' ab ahl-e-dil bhi bane hain zamana-saz

kis se karen wafa ki talab apne shahr mein