fariyaad bhi main kar na saka be-KHabari se

fariyād bhī maiñ kar na sakā be-ḳhabarī se

dil khīñch liyā us ne kamand-e-nazarī se

us but ko kiyā raam na soz-e-jigrī se

naale mire badnām hue be-asarī se

kab dil pe asar kartā hai zālim kā tamalluq

milte haiñ kahīñ zaḳhm-e-jigar baḳhiya-garī se

hai sāya-fagan taaza nihāl-e-chaman-e-husn

nisbat mire dil ko hai aqīq-e-shajrī se

uḌ jaate tere hosh mire naġhmoñ se bulbul

kar shukr ki majbūr huuñ be-bāl-o-parī se

har lutf se ḳhālī hai faroġh-e-dam-e-pīrī

raushan huā ye nuur charāġh-e-saharī se

dāman kī kalī bād-e-sabā khol sake kab

sātir nahīñ Darte haiñ kabhī parda-darī se

ulfat kā shajar sarv-qadoñ kī hai harī shāḳh

'ushshāq ko bāvar huā ye be-samarī se

kahte haiñ vo sun kar ḳhabar-e-rehlat-e-ushshāq

jaldī gayā kahnā thā hameñ kuchh safarī se

hoñ laakh ḳhatar kūcha-e-dilbar na chhuTegā

uTh saktī hai zillat bhī kahīñ mard-e-jarī se

nafrat nahīñ lāzim tujhe zālim evaz-e-rahm

baiThā huuñ maiñ dil kho ke tirī hīla-garī se

'āmil kareñ ik baar agar band to mai-kash

ḳhālī kareñ sau martaba shīshe ko parī se

kar dete haiñ yuuñ harza-darā ko kumalā-band

lab zaḳhm ke jis tarah mileñ baḳhiya-garī se

aġhyār hue kab mirī nākāmī kā baa.is

mahrūmiyāñ paidā huiiñ āshufta-sarī se

kar ġhair ko apnā ki murādoñ kā nishāñ de

bekār vo paikāñ hai judā ho jo sarī se

a.amāl-e-'habīb'-e-jigar-afgār kī kashtī

sāhil pe pahuñch jā.egī ashkoñ kī tarī se

fariyaad bhi main kar na saka be-KHabari se

dil khinch liya us ne kamand-e-nazari se

us but ko kiya ram na soz-e-jigri se

nale mere badnam hue be-asari se

kab dil pe asar karta hai zalim ka tamalluq

milte hain kahin zaKHm-e-jigar baKHiya-gari se

hai saya-fagan taza nihaal-e-chaman-e-husn

nisbat mere dil ko hai aqiq-e-shajri se

uD jate tere hosh mere naghmon se bulbul

kar shukr ki majbur hun be-baal-o-pari se

har lutf se KHali hai farogh-e-dam-e-piri

raushan hua ye nur charagh-e-sahari se

daman ki kali baad-e-saba khol sake kab

satir nahin Darte hain kabhi parda-dari se

ulfat ka shajar sarw-qadon ki hai hari shaKH

'ushshaq ko bawar hua ye be-samari se

kahte hain wo sun kar KHabar-e-rehlat-e-ushshaq

jaldi gaya kahna tha hamein kuchh safari se

hon lakh KHatar kucha-e-dilbar na chhuTega

uTh sakti hai zillat bhi kahin mard-e-jari se

nafrat nahin lazim tujhe zalim ewaz-e-rahm

baiTha hun main dil kho ke teri hila-gari se

'amil karen ek bar agar band to mai-kash

KHali karen sau martaba shishe ko pari se

kar dete hain yun harza-dara ko kumala-band

lab zaKHm ke jis tarah milen baKHiya-gari se

aghyar hue kab meri nakaami ka bais

mahrumiyan paida huin aashufta-sari se

kar ghair ko apna ki muradon ka nishan de

bekar wo paikan hai juda ho jo sari se

aamal-e-'habib'-e-jigar-afgar ki kashti

sahil pe pahunch jaegi ashkon ki tari se