fariyaad hai ab lab par jab ashk-fishani thi

fariyād hai ab lab par jab ashk-fishānī thī

ye aur kahānī hai vo aur kahānī thī

ab dil meñ rahā kyā hai juz hasrat-o-nākāmī

vo niish kahāñ baaqī ḳhud jis kī nishānī thī

jab dard sā thā dil meñ ab dard hī ḳhud dil hai

haañ ab jo haqīqat hai pahle ye kahānī thī

pur-āb sī rahtī thiiñ pahle ye mirī āñkheñ

haañ haañ isī dariyā meñ ashkoñ kī ravānī thī

ai chashm haqīqat meñ duniyā ko ye samjhā de

baaqī bhī vahī niklī jo chiiz ki faanī thī

bulbul ne to afsāna apnā hī sunāyā thā

gulshan kī kahānī to phūloñ kī zabānī thī

yuuñ ashk bahā.e the yuuñ kiiñ na thiiñ fariyādeñ

ik baat chhupānī thī ik baat batānī thī

saada nazar aatā hai ab to varaq-e-dāman

ab tak mire dāman par āñkhoñ kī nishānī thī

'bahzād' kā vo aalam bhī ḳhuub hī aalam thā

'bahzād' kī nazroñ meñ har chiiz javānī thī

fariyaad hai ab lab par jab ashk-fishani thi

ye aur kahani hai wo aur kahani thi

ab dil mein raha kya hai juz hasrat-o-nakaami

wo nish kahan baqi KHud jis ki nishani thi

jab dard sa tha dil mein ab dard hi KHud dil hai

han ab jo haqiqat hai pahle ye kahani thi

pur-ab si rahti thin pahle ye meri aankhen

han han isi dariya mein ashkon ki rawani thi

ai chashm haqiqat mein duniya ko ye samjha de

baqi bhi wahi nikli jo chiz ki fani thi

bulbul ne to afsana apna hi sunaya tha

gulshan ki kahani to phulon ki zabani thi

yun ashk bahae the yun kin na thin fariyaaden

ek baat chhupani thi ek baat batani thi

sada nazar aata hai ab to waraq-e-daman

ab tak mere daman par aankhon ki nishani thi

'bahzad' ka wo aalam bhi KHub hi aalam tha

'bahzad' ki nazron mein har chiz jawani thi