فریاد شکستہ ہے آواز شکستہ ہے

فریاد شکستہ ہے آواز شکستہ ہے

غمگین ہے ہر نغمہ ہر ساز شکستہ ہے

کیا یہ بھی ضروری ہے انجام شکستہ ہو

جس کام کا اے ہمت آغاز شکستہ ہے

کس وقت قفس کے در صیاد نے کھولے ہیں

جب وائے نصیب اپنی پرواز شکستہ ہے

قربان تھی کل جس پر رفعت بھی ستاروں کی

کیوں آج وہی ہم دم شہباز شکستہ ہے

پہنچے گا بھلا کیسے وہ اپنی بلندی تک

جس مرغ گلستاں کی پرواز شکستہ ہے

کہنے کو تو میں اپنے سینے میں چھپائے ہوں

اے دوست حقیقت میں ہر راز شکستہ ہے

ارباب سماعت کی کیوں آنکھ نہ بھر آئے

اس درد بھرے دل کی آواز شکستہ ہے

کیسے ہو شریفؔ اپنی ہر ایک غزل اچھی

تخئیل ہے افسردہ پرواز شکستہ ہے