فرماں بردار ہیں اس شہر کی ساری آنکھیں

فرماں بردار ہیں اس شہر کی ساری آنکھیں

کیا قیامت ہیں مرے یار تمہاری آنکھیں

اک تری دید سے اس گھر میں اجالا ہوگا

ایک مدت سے ہیں بیتاب بچاری آنکھیں

اب کے اس دیس محبت کا بڑا قحط پڑا

دل ہے کاسہ کسی مفلس کا بھکاری آنکھیں

بند تھا راستہ اٹکی تھی مری سانس کی ڈور

اف کسی آنکھ سے پھر میں نے گزاری آنکھیں

جب میسر نہ تھی مے میکدے پابند ہوئے

روپ میں یار کے اللہ نے اتاری آنکھیں

میں ترا رقص ترے شہر میں آ کر دیکھوں

مجھ کو بھی چاہیے دو چار بزاری آنکھیں